षडरिपु झाले बहु उपकारी
षडरिपु झाले बहु उपकारी ।
अजातशत्रु मी झालो ॥ धृ ॥
मत्सर वाटे चरणधुळीचा ।
बिलगून राही त्या पायांना ।
लोभ जडला त्या पायांचा ।
लोभ वाढत राहो ॥ १ ॥
क्रोध लई मज विभक्तीचा ।
आडवी येई जवळ जाण्या ।
सावळ्याचा मोह मोठा ।
त्यातचि मी गुरफटलो ॥ २ ॥
काम एकचि दासपणाचा ।
का मी कामी कामनांचा ।
मद भरला मोक्षमुक्तिचा ।
मोक्षातूनी मी सुटलो ॥ ३ ॥
एकही दुर्गुण न त्यागता ।
मनास माझ्या ना रोकता ।
पिपास आली शत्रुमित्रता ।
बापूशरण पावलो ॥ ४ ॥
